अमन की आशा

म्हटलं तर `त्या` दोघी बहिणीच. म्हटलं तर जुळ्याच... किंवा म्हटलं तर पाठोपाठच्या...

म्हटलं तर लहान-मोठ्या. म्हटलं तर जवळच्या किंवा म्हटलं तर लांबच्यादेखील...

म्हटलं तर `त्यांच्या` येण्याच्या चाहुलीनं सारं घरदार आनंदलेलं. किंवा म्हटलं तर आजही आनंदतच...

म्हटलं तर वयस्करांनी `त्यांचं` नाव काय ठेवावं याचा चिक्कार काथ्थाकूट केला. किंवा म्हटलं तर केवळ मिनिटभरात `त्यांची` नावं निवडली गेली...

म्हटलं तर आयाबायांनी `त्यांच्या` स्वागताचा सोहळाच ठरवून टाकला. किंवा म्हटलं तर `त्यांचं` येणं हाच एक सोहळा होता...

म्हटलं तर पोराटोरांना `त्यांच्या`बद्दल कुतुहल वाटलं. किंवा म्हटलं तर किंचितशी आपुलकीची असूयाही...

म्हटलं तर तरुणांना `त्यांनी` कधीचीच मोहिनी घातली होती. किंवा म्हटलं तर मोहिनीचंच दुसरं रुप होत्या `त्या`...

म्हटलं तर `त्यांनी` तरुणींना नवी स्वप्नं दाखवली. किंवा म्हटलं तर `त्याच` भासत होत्या स्वप्नवत...

म्हटलं तर `त्या` आल्याच. नव्या उमेदीनं... ताज्या दमानं... किंवा म्हटलं तर `त्या` आल्या हीच घटना झाली राज्यभर... अधिकृत...

म्हटलं तर `त्यांच्या` येण्यानं समस्त लोकांना झाला आनंद. किंवा म्हटलं तर झाली लोकशाहीतल्या नव्या पर्वाची सुरूवात...

म्हटलं तर `त्यांच्या` येण्याची गोष्ट पार ६७ वर्षं जुनी. किंवा म्हटलं तर आजही आहे नवीनवी...

म्हटलं तर `त्या`निमित्तानं केलं जातं संचलन. किंवा म्हटलं तर `तो` असतो `अनेकता में एकता`चा कळतनकळत दाखला...

म्हटलं तर `त्यांचं` येणं सुकर करणाऱ्या अनाम अमर आठवणींची ज्योत. किंवा म्हटलं तर `त्यांचं` अस्तित्व शाबूत ठेवणाऱ्यांचा सत्कार.

म्हटलं तर भारतीय नागरिकत्वाची हवीशी पुन्हापुन्हा उठणारी मोहोर. किंवा म्हटलं तर पुढच्या पिढीसाठी ठेवा अनमोल...

म्हटलं तर असंख्य खेळाडूंना खेळवतात. किंवा म्हटलं तर खेळांच्या मैदानात `त्या` जोमानं सरसावून खेळतात...

म्हटलं तर कडेकपारींतल्या संगीताच्या सुरावटींतून. किंवा म्हटलं तर लोकप्रिय संगीताच्या बॉलिवूडी तडक्यांतून ऐकायला येतो `त्यांचा` आवाज...

म्हटलं तर मनामनांवर राज्य करणाऱ्या हिंदी चित्रपटांतून. किंवा म्हटलं तर अस्सल प्रादेशिकपटांतल्या संस्कृतींमधून `त्या` डोकावतात...

म्हटलं तर सोशल मिडियावरच्या शेअरिंग पोस्टमधून. किंवा म्हटलं तर अनेकांच्या डीपीजमधून झळकतात `त्या`...

म्हटलं तर विलक्षण अशा बहुभाषिक साहित्यकृतींतून. किंवा म्हटलं तर मैलांगणिक बदलत्या बोलीभाषांतून `त्या` वावरताहेत...

म्हटलं तर असं `त्यांचं` अस्तित्व जाणवतं असंख्य क्षणांमधून. किंवा म्हटलं तर आता हवंय `त्यांना` जपायला...

म्हटलं तर झाल्यात `त्या` ज्येष्ठ नागरिक. किंवा म्हटलं तर `त्या` म्हणतील फिरून नवी जन्मेन मी...

म्हटलं तर एक आहे अमन. म्हटलं तर एक आहे आशा. किंवा म्हटलं तर आहेत अमन की आशा...