`तो`

`तो` आला, `त्यानं` पाहिलं, `त्यानं` जिंकलं...

मोसमातला पहिला थेंब. शुभेच्छांची देवघेव. आशादायी उठाठेव.

हिरवे भवताल. मनं तजेलदार. उत्साहाचा चमत्कार.

सत्य की भास. आता थोडा सहवास. धरा आनंदाची कास.

चोहूकडं पसरावा. सुखाचा ठेवा. समृद्धीचा मंत्र व्हावा.

रुजेल बियाणे. पिकांचे तराणे. निवारावे दुष्काळाचे दुःसह्य गाणे.

कोसळत्या वर्णनांच्या धारा. शब्दांचा बेभान वारा. भावना लोटती महापूरा.

चमचमीत. शेकतशेकत. अस्सल खवय्येगिरीची सोबत.

गळके छप्पर. रस्ते कुठले, खड्डे शंभर. कचरा कुंडीच्या बाहेर.

डासांची गुणगुण. माशांची भुणभुण. बेडकांचं डरावणं.

गारेगार वारे. विजा चमकदार. गडगडाट भारी लयदार.

वाटेतले कोपरे-आसरे. छत्र्या-रेनकोटांचे सहारे. कधी तरी फक्त भिजा रे.

जनी-मनी वसे. रानी-वनी हसे. `तो`च कायम सरसे.

`तो` आला, `त्यानं` पाहिलं, `त्यानं` जिंकलं...