अपडेटेड

आपण होताहोत क्षणाक्षणाला अपडेट

ये हैं अपडेटेड टेक्नॉलॉजी की माया...

कोसळताहेत बातम्यांचे कडे धडाधड

होताहेत फोटो अपलोड पटापट...

ढीगभर अँप्स गिळंकृत करताहेत फोन मेमरी

क्षणार्धात कळतंय कसे आहेत छोरा-छोरी...

समोरच्या माणसाला बुजलेला

प्रत्यक्ष संवादाला कुलुप लावलेला...

सोशल मिडियावर भडाभडा बोलतो

चटाचटा पोस्टून अस्तित्व दर्शवतो...

कधी गाठतो एकटेपणाची गढी

उकरतो आठवणींची मढी...

गळा काढून संस्कृतीच्या नावानं

स्वतः चालतो आपल्याच नादानं...

कधी उचलतो वेदनांची तळी

शांततेआडूनही बंदुकीची गोळी...

कधी चालवतो सर्जनावर तलवार

शब्दांतीत होतात अत्याचार...

जाणीवांचा यक्ष दडवला जातो

शैलीचं झाकण कचकचून आवळतो...

सैरभैर होतं मग मोरपीस

का त्यालाही होतेय लागण?...

कधी कोरड्या दुःखाचा फुटतो पाझर

सामाजिक बांधीलकीचा वाहतो निर्झर...

स्वच्छता, सदाचाराचे फुटतात धुमारे

वाहतात केवळ सेल्फीचेच वारे...

लाईक्स मोजता मोजता

आयुष्य होत राहातंय डिलिट…

सतत पोस्टण्याच्या नादात

जगण्याची स्पेस होतेय ट्विट...

जो तो लिहितोय, फोटोतोय

व्हिडिओतोय, रिअॅक्टतोय...

कोटींतले हजारभर राहिलेत का सुजाण?

आहे का त्यांच्या विचारांची जाण?

नाही झालाय ना त्यांच्या संवेदनांचा बाजार

आहे का अजून त्यांच्या माणूसपणाचा आधार...

करो क्लिक, शोधा, सर्चा

लवकर लवकर, येईल मोर्चा...

व्हावं लागेल मग डिसकनेक्ट

कदाचित तेव्हा होऊ खरे अपडेट!!!!

U

PDATE

UPDATE

UPDATE